«Ливерпуль» Конатеге алмастыру тапты: жас қорғаушыларға сенім

Франция құрамасының қорғаушысы Ибраима Конате «Ливерпульден» еркін агент ретінде кетуі мүмкін, алайда мерсисайдтықтар оның орнын басатын ойыншыны анықтап қойды, деп хабарлайды SportsNews ақпарат агенттігі.

Журналист Джеймс Пирстің хабарлауынша, тараптар әлі күнге дейін келісімшартты ұзарту туралы келісе алмаған, сондықтан француз қорғаушысы клубтан еркін агент ретінде кетуге жақын.

Сонымен қатар, «Ливерпуль» басшылығы болашаққа арналған жоспарын белгілеп қойған сияқты және Конатеге тікелей алмастыруды трансфер нарығынан іздеуге ниетті емес. Клуб Вирджил Ван Дейктің қасындағы орынды екі жас орталық қорғаушы – Жереми Жаке мен Джованни Леони ала алатынына сенімді.

20 жастағы Жаке шілде айында «Ренннен» 60 миллион еуродан астам сомаға ауысып, «Ливерпульге» қосылады. Ал қазір 19 жастағы Леони бір жыл бұрын «Пармадан» 30 миллион еуроға жуық қаржыға келген болатын.

Дереккөздің мәліметінше, «Ливерпуль» екі футболшыны да Еуропадағы ең үздік жас орталық қорғаушылардың бірі деп санайды және олардың алдағы жылдары команда қорғанысының негізі болатынына үміттенеді.