Хулиан Альварес «Атлетикодан» кетеді: үш топ-клуб трансферге дайын

Мадридтік «Атлетико» шабуылшысы Хулиан Альварес бас бапкер Диего Симеонемен келіспеушіліктерге байланысты осы жазда клубтан кетпекші, деп хабарлайды SportsNews ақпарат агенттігі.

Испаниялық Marca басылымының хабарлауынша, аргентиналық шабуылшы Диего Симеонемен жұмыс істеуде өзін ыңғайсыз сезінеді және трансферді талап етуде. Оған үш ірі еуропалық клуб – «ПСЖ», «Арсенал» және «Барселона» қызығушылық танытып отыр.

Хулиан Альварестің өкілдері париждіктердің бас бапкері Луис Энрике ойыншыға жеке хабарлама жібергенін растады. Сондай-ақ, «канонирлердің» жаттықтырушысы Микель Артета да наурыз бен мамыр айлары аралығында аргентиналықпен байланысқан.

«Барселонаның» спорт директоры Деку Альварестің агентіне Чемпиондар Лигасының жартылай финалдық матчы алдында қоңырау шалып, егер мүмкіндік туса, «Барселонаның» трансферге қызығушылық танытатынын жеткізген.

Осы маусымда 26 жастағы Альварес 49 матчқа қатысып, 20 гол соғып, 9 нәтижелі пас берген. Оның «Атлетикомен» келісімшарты 2030 жылдың жазына дейін болса да, Transfermarkt порталы оны 90 миллион еуроға бағалайды, бірақ Альварестің клубтан кетуге деген ниеті өте күшті сияқты.