Гордон «Барселонаға» ауыса ма? Қымбат вингер трансферге дайын

Англиялық «Ньюкасл» клубының вингері Энтони Гордон каталондық «Барселонаға» ауысуға алдын ала келісімін берді, деп хабарлайды SportsNews ақпарат агенттігі.

Инсайдер Фабрицио Романоның мәліметінше, 25 жастағы футболшы «көк-гранаттылар» сапындағы мансабын жалғастыру нұсқасын оң бағалап отыр. Егер клубтар өзара келісімге келсе, Гордон трансферге келісім беруге дайын.

Бұған дейін «Барселонаның» спорт директоры Деку «Ньюкаслмен» ресми келіссөздер жүргізіп жатқаны хабарланған болатын. Англия Премьер-Лигасының бірнеше клубы да бұл жағдайға араласқысы келгенімен, Гордон үшін испандық гранд басымдыққа ие болып отыр.

Дереккөздің мәліметінше, ықтимал мәміле құны 70-тен 80 миллион еуроға дейін болуы мүмкін.

Аяқталған маусымда Энтони Гордон «Ньюкаслдың» негізгі ойыншыларының бірі болды. Англиялық вингер барлық турнирлерде 46 матч өткізіп, 17 гол соғып, бес нәтижелі пас берді.

Transfermarkt порталының мәліметінше, футболшының нарықтық құны 60 миллион еуроға бағаланады. Гордонның «Ньюкаслмен» қазіргі келісімшарты 2030 жылдың жазына дейін жарамды.