«Барселона» Альвареспен келісімшартты бекітті: «Атлетико» 150 млн еуро сұрайды

Мадридтік «Атлетико» шабуылшысы Хулиан Альварес каталондық «Барселонаға» ауысуға өте жақын, деп хабарлайды SportsNews ақпарат агенттігі.

Инсайдер Сесар Луис Мерлоның мәліметінше, «көк-гранаттылар» аргентиналық шабуылшымен жеке келісімшарт шарттары бойынша келісімге келген.

Енді «Барселона» басшылығы Альварестің трансфері бойынша «Атлетикоға» ресми ұсыныс дайындап жатыр. Каталондықтар мәмілеге өз футболшыларын қосуды жоспарламайды және трансферді ақшалай өтемақымен жабуды көздеп отыр.

Мадридтік клуб аргентиналық ойыншыны 150 миллион еуроға сатуға дайын.

26 жастағы Альварес «Атлетико» сапында 2024 жылдың жазынан бері «Манчестер Ситиден» ауысып келгеннен кейін ойнап келеді. Осы маусымда шабуылшы барлық турнирлерде 49 матч өткізіп, 20 гол соғып, тоғыз нәтижелі пас берді.

Альварестің «матрасшылармен» келісімшарты 2030 жылдың жазына дейін есептелген, ал оның өтемақы сомасы 500 миллион еуроны құрайды. Transfermarkt порталы футболшының нарықтық құнын 90 миллион еуроға бағалайды. Аргентина құрамасы сапында Альварес 2022 жылғы әлем чемпионатын жеңіп алған болатын.