Альварес таңдауы: "Барселона" ма, әлде ПСЖ ма?

Мадридтік "Атлетико" мен Аргентина құрамасының шабуылшысы Хулиан Альварестің болашағы жақын арадағы трансферлік терезенің басты тақырыптарының біріне айналуы мүмкін, деп хабарлайды SportsNews ақпарат агенттігі.

Каталондық "Барселона" және француздық "Пари Сен-Жермен" клубтары шабуылшыға қызығушылық танытуда. PSG REPORTER мәліметінше, аргентиналық футболшының өзі "көк-гранаттылар" сапында өнер көрсеткенді қалайды. Алайда, Альварестің агенті париждік клубқа ауысу мүмкіндігін де қарастырып, ықтимал трансфер бойынша белсенді жұмыс істеп жатыр.

Дереккөздің хабарлауынша, екі клуб та 25 жастағы шабуылшының айналасындағы жағдайды мұқият бақылауда. Каталондықтар Альваресті шабуыл шебін күшейту үшін басым нұсқалардың бірі ретінде қарастырса, ПСЖ сәтті маусымнан кейін құрамына тағы бір жұлдызды ойыншы қосуды көздейді.

Әзірге түпкілікті шешім қабылданған жоқ, дегенмен футболшының өзі "Барселонаға" ауысуға бейім екені айтылады.

Хулиан Альварес 2024 жылдың жазында "Манчестер Ситиден" 75 миллион еуроға ауысып, мадридтік "Атлетико" ойыншысы атанған болатын. Аргентиналық футболшының мадридтік клубпен келісімшарты 2030 жылдың маусым айына дейін жасалған.

Осы маусымда шабуылшы барлық турнирлерде 49 матч өткізіп, 20 гол соғып, тоғыз нәтижелі пас берді.