Артистикалық жүзуден Әлем Кубогында Қазақстан қола медаль жеңді

Артистикалық жүзуден Қазақстан құрамасы Испанияның Понтеведра қаласында өткен Әлем Кубогы кезеңінде алғашқы медалін жеңіп алып, турнирді сәтті бастады, деп хабарлайды SportsNews ақпарат агенттігі.

Халықаралық турнирдің алғашқы күнінде қазақстандық спортшылар жоғары шеберлік көрсетіп, қола жүлдеге ие болды.

Елімізге тарихи медальді техникалық бағдарлама бойынша аралас жұптар арасындағы жарыста Ясмина Исламова мен Алдияр Рамазанов әкелді. Қазақстандық дуэт өз өнері үшін төрешілерден 208.6150 балл алды.

Бұл бағдарламада алтынды Ұлыбританиядан келген Изабель Торп пен Ранджуо Томблин жұбы 225.9034 баллмен жеңіп алды. Күміс медальдар Испания өкілдері Карла Лоренцо Льюска мен Энеко Санчес Агиларға 210.8792 баллмен бұйырды.

Тағы бір қазақстандық жұп, Артур Майданов пен Айғаным Сайым, пьедесталдан бір қадам қалып, лайықты нәтиже көрсетті. Олар 207.0650 балл жинап, төртінші орынға тұрақтады.