Қазақстан 14 медаль жеңді: жас балуандар Азия чемпионатында үздік шықты

Вьетнамның Дананг қаласында аяқталған жасөспірімдер арасындағы күрес түрлерінен Азия чемпионатында Қазақстанның жас балуандар құрамасы тамаша нәтиже көрсетті, деп хабарлайды SportsNews ақпарат агенттігі.

Қазақстандық спортшылар жалпы есепте 14 медаль жеңіп алып, жас балуандардың жоғары дайындық деңгейін дәлелдеді. Команда қоржынында 3 алтын, 4 күміс және 7 қола жүлде бар.

Еркін күрес жарыстарында Әділет Рысбай (71 келіге дейін) алтын медальді жеңіп алып, жарыстың жеңімпазы атанды. Мардан Орынбасаров (60 келіге дейін) күміс медальді жеңіп алып, екінші орынға көтерілді.

Еркін күрестен қола жүлдегерлер қатарында Сабыржан Рахатов (51 келіге дейін), Темірғали Мұрат (55 келіге дейін), Әділбек Ерболатов (80 келіге дейін) және Нұрислам Айтұған (92 келіге дейін) болды, олар команда қоржынын тағы төрт жүлдемен толықтырды.

Грек-рим күресінде де Қазақстан керемет нәтижелер көрсетті. Қуанышбек Жанажол (51 келіге дейін) мен Мирас Махамбет (65 келіге дейін) Азия чемпиондары атанып, елге алтын медальдар әкелді. Арыстан Темірғали (110 келіге дейін) күміс жүлдеге ие болса, Әли Алмас (45 келіге дейін) пен Датқа Лесбек (48 келіге дейін) қола жүлдегер атанды.

Қыздар арасында Інжу Баққожа (46 келіге дейін) мен Арайлым Көпжасар (53 келіге дейін) өз салмақ дәрежелерінде екінші орын алып, күміс медальдарды жеңіп алды. Аянат Мейнамбай (49 келіге дейін) жарысты қола жүлдемен аяқтап, үшінші орынға көтерілді.