Ангелина Мельникова: неліктен жас гимнастшылар спортты жек көреді?

Спорттық гимнастикадан Олимпиада чемпионы Ангелина Мельникова жас спортшылардың психологиялық және физикалық қысымға тап болатыны, бұл олардың спорт түріне деген жеккөрушілікке жиі әкелетіні туралы ашық айтты, деп хабарлайды SportsNews ақпарат агенттігі.

Мельникованың айтуынша, көптеген гимнастшылар 18-20 жасқа жеткенде спорттық гимнастиканы жек көріп кетеді. Бұған бапкерлер тарапынан болған үлкен қысым, соның ішінде психологиялық және физикалық қысым себеп болады.

«Маған бапкерлердің ондай қарым-қатынасы болмағандықтан, жаттығу процесі ұнайтын. Мен жаттығу процесін жақсы көрдім, ал егер ол саған жылдар бойы ұнаса, ішіңде гимнастиканы жақсы көретін сезім пайда болады», – деді Ангелина Мельникова.

Олимпиада чемпионы кейбір спортшылардың жағдайына тоқталды. Ол бапкерлердің жылдар бойы балаларды қорлап, жарақаттарына қарамастан көптеген қайталауларды жасауға мәжбүрлейтінін айтты. Мұндайда спортшыларға материал ретінде қарайды.

«Әрине, сен мұны бала кезіңнен сезесің. Ал кейін есейгенде, бұл көп жылдар бойы жалғасқанын түсінесің. Міне, сонда басыңда толықтай проблема туындап, адамдар гимнастиканы жай ғана жек көріп кетеді», – деп түсіндірді Мельникова.

Ангелина Мельникованың айтуынша, оны бұл жағдайдан бапкерлері мен ата-анасы аман алып қалған. Ол бұл туралы Елена Веснинаға BB Tennis арнасында берген сұхбатында мәлімдеді.