Рыбакина «Ролан Гаррос» – 2026 турнирінде сенімді бастады: Эрьявецті жеңді

Әлемнің екінші ракеткасы, қазақстандық теннисші Елена Рыбакина Францияның ашық чемпионаты «Ролан Гаррос» – 2026 турниріндегі жолын сәтті бастап, бірінші айналымда словениялық Вероника Эрьявецті 6:2, 6:2 есебімен сенімді жеңді, деп хабарлайды SportsNews ақпарат агенттігі.

Рыбакина мен әлемнің 84-ші ракеткасы Эрьявец арасындағы матч 1 сағат 16 минутқа созылды. Осы уақыт ішінде Елена мықты ойын көрсетіп, екі эйс жасады және бірде-бір қос қателік жібермеді.

Қазақстандық спортшы брейк жасау мүмкіндіктерін де тиімді пайдаланып, бес брейк-пойнттың төртеуін жүзеге асырды. Өз кезегінде, Эрьявец бірде-бір эйс жасай алмады, қос қателік жібермеді, бірақ өзі тапқан төрт брейк-пойнттың ешқайсысын да орындай алмады.

«Ролан Гаррос» – 2026 беделді турнирінің екінші айналымында Елена Рыбакина украиналық теннисші Юлия Стародубцевамен кездеседі.