Монфис Свитолинаға жүрегінен шыққан сөздерін арнады: «Сенсіз мен мұнда болмас едім»

Әлемнің бұрынғы алтыншы ракеткасы, танымал француз теннисшісі Гаэль Монфис «Ролан Гаррос» турниріндегі соңғы матчынан кейін әйелі, украиналық теннисші Элина Свитолинаға жүрегінен шыққан сөздерін арнады, деп хабарлайды SportsNews ақпарат агенттігі.

«Әйеліме алғыс айтқым келеді. Ол болмаса, мен бүгін мұнда болмас едім. Біз сегіз жыл бойы біргеміз. Сен мені қолдадың, маған демеу болдың және мені сүйдің. Сен маған ең маңызды сыйлықты – қызымызды сыйладың. Мен сені сүйемін», — деп Монфистің сөздерін The Tennis Letter басылымы X әлеуметтік желісінде жариялады.

Бұл эмоционалды сәт Монфис турнирдегі өнерін аяқтағаннан кейін орын алды. Ол бірінші айналымда әлемдік рейтингте 118-ші орында тұрған отандасы Юго Гастонға есе жіберді. Кернеулі кездесуде Гаэль Монфис 2:6, 3:6, 6:3, 6:2, 0:6 есебімен жеңіліс тапты.