«Барыстан» жаппай кету: 23 ойыншы, оның ішінде құрама капитаны, еркін агент атанды

Континенталды хоккей лигасының (ҚХЛ) баспасөз қызметі 2025 жылдың 1 маусымынан бастап шектеусіз еркін агент мәртебесін алған хоккейшілердің тізімін жариялады. Бұл тізімге астаналық «Барыс» жүйесінде өнер көрсеткен ойыншылардың елеулі тобы енді, деп хабарлайды SportsNews ақпарат агенттігі.

Жалпы, қазақстандық клубтың 23 хоккейшісімен келісімшарт мерзімі аяқталды, олар енді ҚХЛ-дың басқа командаларымен өз бетінше келіссөздер жүргізуге және елордалық команда жүйесінен тыс мансабын жалғастыруға толық құқылы.

Осы ойыншылардың қатарында Қазақстан құрамасының капитаны Роман Старченко да бар. Өткен маусымда тәжірибелі шабуылшы «Барыстың» фарм-клубы – «Номадқа» ауыстырылған болатын, бұл көптеген жанкүйерлер үшін күтпеген жағдай болды. Енді Старченко, басқа еркін агенттер сияқты, өзінің кәсіби мансабын жалғастыру үшін жаңа мүмкіндіктер іздей алады.

Айта кетейік, «Барыс» үшін өткен маусым сәтсіз аяқталды. Елордалық клуб тұрақты чемпионатты Шығыс конференциясының кестесінде оныншы орынмен аяқтап, ҚХЛ плей-оффына шыға алмады. Ойыншылардың жаппай кетуі келесі маусым алдында команда құрамындағы елеулі өзгерістерді білдіруі мүмкін.