Нани футболкасы 400 мыңға: "Ақтөбе" жанкүйерімен жанжал жалғасын тапты

Футбол матчы кезінде бетіне доп тиген "Ақтөбе" жанкүйерімен болған оқиға күтпеген жерден жалғасын тапты, деп хабарлайды SportsNews ақпарат агенттігі.

Бұл оқиға Қазақстан Кубогы аясындағы "Ақтөбе" мен "Алтай" футбол клубтары арасындағы матч кезінде болған еді. Ойын барысында футболшы тепкен доп трибунаға ұшып, екінші қатарда отырған жанкүйердің бетіне тиген.

Соққының қатты болғаны сонша, төрт баланың анасын шұғыл ауруханаға жатқызуға тура келді. Дәрігерлер оған жабық бас-ми жарақатын, ми шайқалуын диагностикалап, бетіне тігіс салған.

Бастапқыда "Ақтөбе" ФК зардап шеккен жанкүйерге өтемақы ұсынғаны хабарланған болатын. Алайда жанкүйер стадионда қорғаныс торы мен қарапайым ескерту тақталарының болмауына наразылық білдіріп, сотқа жүгінетінін мәлімдеген еді.

Іс сотқа жетпей, тараптар ымыраға келе алды. Клуб өкілдері жанкүйерді кеңсеге шақырып, оған "Ақтөбе" клубының жұлдызды легионері, португалиялық футболшы Луиш Нанимен кездесу ұйымдастырды.

Татуласу белгісі ретінде Луиш Нани оған қолтаңбасы бар естелік футболкасын сыйлады. Сонымен қатар, клуб оған стадионның қауіпсіз аймағындағы үй матчтарына бару үшін екі маусымдық абонемент берді.

Біраз уақыттан кейін "Ақтөбе" ФК-дан алынған сол сыйлықтар танымал OLX тегін хабарландырулар сайтынан табылды. Луиш Нанидің №17 жеке қолтаңбасы бар футболкасы 400 мың теңгеге сатылымға қойылды.

Клуб матчтарына арналған екі жылдық абонемент те 60 мың теңгеге бағаланып, сатылымға шығарылды.