Джокович «Ролан Гаррос» турнирін жеңіспен бастады: серб Перрикарды ұтты

Әлемнің төртінші ракеткасы, сербиялық теннисші Новак Джокович «Ролан Гаррос» — 2026 Франция Ашық чемпионатында сәтті бастама жасады. Ол әлемдік рейтингте 80-орында тұрған француз спортшысы Джованни Мпетчи Перрикарды жеңді, деп хабарлайды SportsNews ақпарат агенттігі.

Тартысты ойын 2 сағат 53 минутқа созылды. Джокович бірінші сетті ұтылғаннан кейін матч барысын өз пайдасына өзгертіп, кездесуді 5:7, 7:5, 6:1, 6:4 есебімен аяқтады.

Матч статистикасына сәйкес, Перрикар 15 эйс жасап, төрт қос қателік жіберді және бес брейк-пойнттың екеуін пайдаланды. Джокович болса, 11 эйс жасап, екі қос қателікке жол берді және он алты брейк-пойнттың бесеуін іске асырды.

Турнирдің екінші айналымында Новак Джоковичті тағы бір француз спортшысы – теннисші Валентен Руае күтіп тұр.