Қазақстандық Данилина мен Александрова: Страсбургтегі WTA-500 жартылай финалында жеңіліс

Қазақстандық теннисші Анна Данилина мен оның ресейлік жұптық серіктесі Екатерина Александрова Страсбургтегі (Франция) WTA-500 санатындағы турнирдегі өнерлерін аяқтады. Олар жартылай финалда канадалық Габриэла Дабровски мен бразилиялық Луиза Стефани жұбына 5:7, 4:6 есебімен жол берді, деп хабарлайды SportsNews ақпарат агенттігі.

Тартысты кездесу 1 сағат 32 минутқа созылды. Осы уақыт ішінде Данилина мен Александрова екі рет эйс жасап, төрт қос қателік жіберді және алты брейк-пойнттың үшеуін пайдалана алды.

Олардың қарсыластары Дабровски мен Стефани бірде-бір эйс жасаған жоқ, екі қос қателік жіберді, бірақ қабылдауда тиімдірек болып, тоғыз брейк-пойнттың бесеуін жүзеге асырды.

Турнирдің финалында Габриэла Дабровски мен Луиза Стефани норвегиялық Улрикке Эйкери мен америкалық Куинн Глисон жұбымен чемпиондық атақ үшін таласады.