Әлем чемпионатының ұлы футболшылары: The Independent үздік 10 ойыншыны атады

Британдық The Independent басылымы әлем чемпионаттары тарихындағы ең ұлы 50 футболшының рейтингін ұсынды, ал алғашқы ондыққа нағыз аңыздар енді, деп хабарлайды SportsNews ақпарат агенттігі.

Беделді тізімді үш дүркін әлем чемпионы, есімі футболдағы ұлылықтың синониміне айналған бразилиялық шабуылшы Пеле бастады. Екінші орынға 1986 жылғы мундиалда өз құрамасын жеңіске жеткізген аргентиналық данышпан Диего Марадона орналасты. Үздік үштікті әлем чемпионаттарында соғылған голдар саны бойынша абсолютті рекордшы (16 гол) неміс шабуылшысы Мирослав Клозе түйіндеді.

Әрі қарай үздік ондыққа әлем футболының Зинедин Зидан (Франция), Йохан Кройф (Нидерланды), Роналдо (Бразилия), Франц Беккенбауэр (Германия), Лотар Маттеус (Германия), Гарринча (Бразилия) және кеңестік қақпашы Лев Яшин сияқты аңыздары енді.

Айта кету керек, The Independent-тің кеңейтілген рейтингіне аргентиналық Лионель Месси мен португалиялық Криштиану Роналду сияқты қазіргі футбол жұлдыздары да кірді. Алайда олардың ешқайсысы мундиалдардың ең ұлы ойыншыларының алғашқы ондығына кіре алмады.