«Қайрат» бапкері Сатпаев туралы: «Челсиге» дейінгі «еуропалық көрсеткіштер»

Алматылық «Қайрат» командасының бас бапкері осы жазда лондондық «Челсиге» ресми түрде ауысатын 17 жастағы қазақстандық шабуылшы Дастан Сатпаевтың ойыны туралы пікір білдірді, деп хабарлайды SportsNews ақпарат агенттігі.

«Қайраттың» бас бапкері Сатпаевтың алаңда атқаратын жұмысының көлеміне тоқталды. Оның айтуынша, жанкүйерлер көбінесе тек голдарға назар аударады, бірақ Дастанның «қара жұмысы» мен командаға қосқан үлесі бағаланбай қалады.

«Дастан үлкен жұмыс атқарады. Сіздер тек оның голдарына қарайсыздар. Егер гол болмаса, Сатпаев жоқ деп ойлайсыздар, бірақ ол қаншама «қара жұмыс» істейді – сіздер оған қарамайсыздар және бағаламайсыздар. Ол жасайтын сол серпілістер, сол спринттер, ол әр ойында еуропалық көрсеткіштерді көрсетеді», – деп есептейді бапкер.

Айта кетейік, «Ордабасы» өз алаңындағы жеңістен кейін 28 ұпаймен турнир кестесін бастап тұр. Алматылық «Қайрат» 26 ұпаймен екінші орында келеді.

Келесі турда «Ордабасы» сырт алаңда семейлік «Елімаймен» кездессе, «Қайрат» өз алаңында «Атырауды» қабылдайды.