The Independent нұсқасы бойынша Пеле әлем чемпионатының үздік ойыншысы атанды

Британдық The Independent интернет-басылымы футболдан әлем чемпионаттары тарихындағы ең үздік ойыншылар рейтингін ұсынды, деп хабарлайды SportsNews ақпарат агенттігі.

Бұл ауқымды сауалнамаға 14 журналист қатысты. Олардың әрқайсысы турнир тарихындағы үздік 30 ойыншының тізімін жасады. Бірінші орын алған футболшы 50 ұпайға ие болса, екінші орынға 45, үшінші орынға 40 ұпай берілді. Одан кейін көрші орындар арасындағы ұпай айырмашылығы біртіндеп азайып, 30-орынға бір ұпай берілді.

Сауалнаманың басты талабына сәйкес, респонденттер «әлем чемпионаттары тарихындағы ең ұлы ойыншыларды, яғни турнирлерге қатысып, белгілі бір немесе бірнеше оқиғада шешуші және, мүмкін, тарихи рөл атқарғандарды» атауы тиіс болды.

Жеке дауыс беру нәтижелері жалпы кестеге біріктірілді. Нәтижесінде, бразилиялық аңыз Пеле 690 ұпаймен тізімнің басынан орын алды. Екінші орынды аргентиналық Диего Марадона (593 ұпай) иеленсе, үшінші орынға тағы бір аргентиналық жұлдыз Лионель Месси (543 ұпай) жайғасты.

Үздік бестікке сондай-ақ Франц Беккенбауэр (ГФР, 457 ұпай) және бразилиялық Роналдо (440 ұпай) енді. Алтыншы орында Зинедин Зидан (Франция, 375 ұпай), сегізінші орында Килиан Мбаппе (Франция, 331 ұпай) тұр. Кеңес Одағының аты аңызға айналған қақпашысы Лев Яшин 32-орынды иеленді.

Айта кетерлігі, бұл тізімге португалиялық Криштиану Роналду енген жоқ. Ол тіпті үздік 50 ойыншының қатарынан да табылмады.