Жаңа Роналду? Криштианудың жиені алғашқы кәсіби келісімшартына қол қойды

Криштиану Роналдудың футболшылар отбасында тағы бір дарынды ойыншы пайда болды: оның 16 жастағы жиені Диниш Перейра португалиялық "Витория Гимарайнш" академиясымен алғашқы кәсіби келісімшартына қол қойды, деп хабарлайды SportsNews ақпарат агенттігі.

Бұл қуанышты жаңалықты Диништің анасы, Криштиану Роналдудың әпкесі Катя Авейру әлеуметтік желідегі парақшасында жариялады. Ол ұлына деген мақтанышын білдіріп, эмоционалды жазба қалдырған.

"16 жасыңда сен алғашқы футбол келісімшартына қол қойдың. Бұл сенің арманың еді, бірақ осы жолдағы әр қадамыңды мен сенімен бірге бастан өткердім. Көз жасы, құрбандық, сүрінулер мен жеңістер болды. Ешкім де бізден бұл жолды тартып ала алмайды. Енді болашақ сенікі. Алға ұш және әрдайымғыдай батыл күресуді жалғастыр. Мен сенімен шексіз мақтанамын, ұлым", – деп жазды Авейру.

Диниш Перейра үшін бұл мансабындағы маңызды кезең. "Витория Гимарайнш" академиясы Португалиядағы ең танымал академиялардың бірі болып саналады және кәсіби футболға үнемі талантты ойыншыларды дайындайды.

Жас шабуылшы бұған дейін "Баррейренсе" U-17 B жасөспірімдер командасының көшбасшыларының бірі болған, тіпті капитандық таңбаны да таққан. Өткен маусымда 16 жастағы шабуылшы 23 матч өткізіп, 13 гол соққан болатын.