«Миланда» жаппай қызметтен босату: Аллегри мен директорлар кетті

«Милан» футбол клубы бас бапкер Массимилиано Аллегриді, сондай-ақ бас директор Джорджо Фурлани мен спорт директоры Игли Тарені қызметінен босатып, ауқымды кадрлық өзгерістер туралы жариялады, деп хабарлайды SportsNews ақпарат агенттігі.

Клубтың ресми мәлімдемесінде бас бапкер Аллегриден бөлек, бас директор Фурлани, спорт директоры Таре және техникалық директор Джеффри Монкада да қызметтерінен босатылғаны айтылған. Бұл шешім команданың маусымды сәтсіз аяқтауына байланысты қабылданды.

«Маусымның басым бөлігінде біз А сериясында алғашқы екі орында тұрып, Скудетто үшін күресуге нақты мүмкіндіктеріміз болды. Алайда маусымның соңғы кезеңі бұрынғы ойындарға мүлдем ұқсамады, ал кешегі соңғы ойындағы өкінішті жеңіліс маусымды толықтай сәтсіздікке айналдырды. Өзгерістер мен футбол операцияларын жан-жақты қайта құру уақыты келді. Бүгіннен бастап біз бас директор Джорджо Фурланимен, спорт директоры Игли Таремен, бас бапкер Массимилиано Аллегримен және техникалық директор Джеффри Монкадамен қоштасамыз. Біз олардың әрқайсысына «Милан» үшін атқарған қажырлы еңбектері мен адалдықтары үшін алғыс айтамыз», — делінген клубтың баспасөз қызметінің мәлімдемесінде.

Италия чемпионатының 38 матчынан кейін «Милан» 70 ұпай жинап, бесінші орынға тұрақтады. Бұл нәтиже оларды Чемпиондар лигасы аймағынан тыс қалдырды.