«Марсель» еурокубоктардан шеттетілуі мүмкін: УЕФА қаржылық ережелерді бұзғаны үшін жазалайды

Францияның «Марсель» футбол клубы қаржылық фэйр-плей ережелерін өрескел бұзғаны үшін 2026/2027 жылғы маусымдағы еурокубоктардан шеттетілуі мүмкін, деп хабарлайды SportsNews ақпарат агенттігі.

L’Equipe басылымының мәліметінше, Еуропалық футбол қауымдастықтары одағы (УЕФА) жақын арада клубтың қаржылық ісін қарайды. «Марсель» рұқсат етілген шығындар лимитінен асып кеткен.

Соңғы үш маусымда «Марсельдің» жалпы шығыны шамамен 157 миллион еуроны құраған. Айта кету керек, 2022 жылы клуб УЕФА-мен келісімге қол қойып, қаржылық фэйр-плей талаптарына сәйкес қаржылық тепе-теңдікке жетуге міндеттенген болатын.

Келісім шарттарына сәйкес, үш жылдық кезеңдегі рұқсат етілген шығындар лимиті 60 миллион еуроны құраған. Алайда, провансальдықтардың нақты көрсеткіштері бұл шекті айтарлықтай асып түскен.

УЕФА-ның тәртіптік органдары француз клубының жағдайын осы аптада қарайды деп күтілуде. Егер бұзушылықтар расталса, «Марсель» келесі маусымда еурокубоктарға қатысу құқығынан айырылуы мүмкін. Бұл олардың Франция чемпионатының қорытындысы бойынша жеңіп алған Еуропа Лигасына жолдамасынан да қағылуына әкеледі.

Өткен маусымда «Марсель» Францияның Лига 1 чемпионатында 59 ұпай жинап, турнир кестесінде бесінші орын алған болатын. «Марсель» — Францияның ең атақты клубтарының бірі, тоғыз дүркін ел чемпионы. Сонымен қатар, провансальдықтар 1993 жылы Чемпиондар Лигасын жеңіп алған жалғыз француз клубы болып қала берген еді. Жақында оларды «Пари Сен-Жермен» басып озып, қатарынан екінші Чемпиондар Лигасы кубогын жеңіп алды.