ҚФФ "Алтай" клубы мен "Тобыл" ойыншысын ҚПЛ турының қорытындысы бойынша жазалады

Қазақстан футбол федерациясы (ҚФФ) бақылау-тәртіптік және этика комитетінің отырысын өткізіп, оның қорытындысы бойынша Премьер-лиганың 11-турындағы екі матчқа қатысты шешімдер қабылдады, деп хабарлайды SportsNews ақпарат агенттігі.

«Алтай» футбол клубы ҚПЛ-2026 11-турында «Оқжетпеспен» өткен матч кезінде анықталған бірқатар ереже бұзушылықтар үшін 90 АЕК мөлшерінде айыппұл салынды. Олардың арасында – көрермендерді нашар тексеру салдарынан тыйым салынған заттарды алып өтуге мүмкіндік беру арқылы қауіпсіздікті қайталап тиісті деңгейде қамтамасыз етпеу.

Сондай-ақ, клуб техникалық аймаққа бөгде адамдардың кіруіне жол берген, қосалқы қақпалардың регламент талаптарына сәйкестігін қамтамасыз етпеген және БАҚ өкілдеріне тану жейделерін бермеген. Айыппұлды Тәртіптік регламенттің 63-бабының 1-тармағына сәйкес 2026 жылдың 26 маусымына дейін төлеу қажет.

11-турда «Тобыл» мен «Ордабасы» арасындағы матчта болған тағы бір оқиғада, «Тобыл» командасының ойыншысы Кирилл Глущенков екі матчқа шеттетілді. Себебі – допқа ойнау мүмкіндігі бола тұра, шамадан тыс күш қолдану арқылы жасалған дөрекі ойын.

Глущенковтің шеттету мерзімі 2026 жылдың 24 мамырынан бастап есептеледі, бұл Тәртіптік регламенттің 44-бабының 1-тармағының 2) тармақшасына сәйкес келеді.