«Манчестер Ситидің» экс-лидері қамауға алынды: себебі белгілі болды
«Манчестер Сити» мен Англия құрамасының бұрынғы ойыншысы Рахим Стерлинг Англияда ұсталды. Футболшы жол-көлік оқиғасынан кейін есірткіге мас күйде көлік басқарды деген күдікке ілінді.
«Фейеноорд» шабуылшысы Рахим Стерлинг Англияда жол-көлік оқиғасынан кейін есірткіге мас күйде көлік басқарды деген күдікпен қамауға алынды, деп хабарлайды SportsNews ақпарат агенттігі.
The Sun мәліметінше, таңертең футболшы Хэмпшир графтығындағы M3 тас жолында жол-көлік оқиғасына түскен. 31 жастағы ағылшын Lamborghini көлігін тізгіндеп келе жатып, жол қоршауына соғылған. Апатқа басқа көліктер қатыспаған, зардап шеккендер де жоқ.
Оқиғадан кейін полиция ойыншыны ұстады. Стерлингке есірткіге мас күйде көлік басқару, қауіпті жүргізу, С санатындағы есірткі сақтау, сондай-ақ медициналық тексеруден өтуден бас тарту айыптары тағылды. Кейін футболшы тергеу аяқталғанға дейін кепілмен босатылды.
Ұлыбританияда С санатындағы есірткіге транквилизаторлар, соның ішінде валиум, анаболикалық стероидтар, азот оксиді және ГГБ жатады.
Стерлинг ақпан айында еркін агент ретінде «Фейеноордқа» қосылған болатын. Роттердамдық клуб сапында ол сегіз матч өткізіп, бір нәтижелі пас берді. Бұған дейін ағылшын «Челси», «Арсенал», «Манчестер Сити», «Ливерпуль» клубтарында және Англия құрамасында ойнаған.
материалдары бойынша Vesti.kz
Еурокубок төлемдері: Football Insider «Қайрат» үшін айырмашылықты әділетсіз деп атады
Чемпиондар Лигасы: Сафонов қатысатын «ПСЖ» – «Арсенал» финалын қайдан көруге болады?
Армения құрамасы Қазақстанмен матчқа құрамын атады: алаңға кім шығады?
