Асылжан Таскет Алматыда ресейлік қарсыласынан нокаутпен реванш алды

Alash Pride жартылай жеңіл салмақтағы чемпионы, қазақстандық ММА файтері Асылжан Таскет (11-3) Алматыда өткен Brave CF 105 және Alash Pride 123 бірлескен турнирінің басты оқиғасында нокаутпен жарқын жеңіске жетіп, өз титулын сәтті қорғады, деп хабарлайды SportsNews ақпарат агенттігі.

Титулдық реваншта оның қарсыласы ресейлік Алексей "Сушист" Мешков (8-5) болды. Бес раундқа есептелген жекпе-жек төртінші раундта мерзімінен бұрын аяқталды: Таскет қарсыласын күшті соққымен нокаутқа түсірді.

Бұл жеңіс Таскет үшін чемпиондық белбеуді сәтті қорғау ғана емес, сонымен қатар көптен күткен реванш болды. Былтыр желтоқсанда Мешков қазақстандықты небәрі 11 секундта нокаутқа түсіріп, оған ауыр жеңіліс әкелген еді.

Осы жеңістің арқасында Асылжан Таскет өзінің кәсіби рекордын 11 жеңіс пен 3 жеңіліске дейін жақсартты. Ал Мешков үшін бұл оның кәсіби мансабындағы бесінші жеңіліс болды.