Джукембаевтың жекпе-жегі тоқтатылды: қазақстандық боксшы көптен күткен айқастан айырылды

Қазақстандық боксшы Батыр Джукембаев (24-1, 17 КО) мен өзбекстандық панчер Шохжахон Эргашев (26-2, 23 КО) арасындағы көптен күткен жекпе-жек оның өтуіне бірнеше күн қалғанда тоқтатылды, деп хабарлайды SportsNews ақпарат агенттігі.

Жекпе-жектің болмайтынын Батыр Джукембаев өзінің әлеуметтік желілерінде хабарлады. Бұл жаңалық боксшы үшін күтпеген жағдай болды, өйткені ол бұл айқасқа бес ай бойы тыңғылықты дайындалған.

«Бүгін маған жағымсыз жаңалық келді. Жекпе-жек болмайды. Шынымды айтсам, айқасқа аз ғана уақыт қалғанда осы хабарды алдым. Бұл бес айда қанша еңбек пен күш жұмсалғанын өздеріңіз білесіздер. Мен бұл жекпе-жекке өте мұқият дайындалдым. Қолымнан келгеннің бәрін жасадым. Бұл айқасқа жүз пайыз дайын болуға тырыстым. Бірақ жекпе-жек өтеді ме, жоқ па – бұл маған байланысты емес. Өкінішке орай, осындай жағымсыз жағдай орын алды. Мен бәріне қарамастан, жақындарым, халқым, елім және барлық жанкүйерлерім мені қолдауды жалғастыратынына сенімдімін. Енді бәрі қалай аяқталатынын және оқиғалардың қалай дамитынын күтеміз. Бірақ не болса да, бұл бізді тоқтатпайды. Болашақта әлі де жақсы жаңалықтар болады деп ойлаймын. Мұндай сынақтар бізді сындырмайды. Бес айлық еңбегім зая кетті деп қол қусырып отырмаймын. Керісінше, мен одан да күшті боламын. Алда басқа да сынақтар болуы мүмкін. Әзірге жағдайдың қалай өрбитінін білмейміз, бірақ бүгінгі жаңалық осындай», — деді Джукембаев.

Джукембаев үшін бұл айқас соңғы уақыттағы ең маңызды жекпе-жектердің бірі болуы тиіс еді. Бастапқыда ол 9 мамырға жоспарланған болатын, бірақ кейін бір айға жуық уақытқа шегеріліп, енді мүлдем тоқтатылды.

32 жастағы боксшы өзінің соңғы ресми жекпе-жегін 2025 жылдың 5 сәуірінде Астанада өткізіп, британиялық Кейн Гарднерді (18-5, 7 КО) төрешілердің бірауыздан шешімімен жеңген болатын.

34 жастағы Шохжахон Эргашев (26-2, 23 КО) қатарынан үшінші жекпе-жегін Өзбекстан аумағында өткізуге дайындалып жатқан еді. Өзбекстандық нокаутшы соңғы рет 4 қаңтарда Самарқандта рингке шығып, үндістандық боксшыны мерзімінен бұрын жеңген.

Жекпе-жектің тоқтатылу себептері әзірге ресми түрде жарияланған жоқ. Джукембаев пен Эргашев арасындағы ықтимал айқастың тағдыры белгісіз болып қалуда.